ბიზნესმენმა "სტერეო პლუსი" ანძიდან ნინო ჩხეიძის მეუღლის სტატუსით გათიშა

ბიზნესმენმა გიორგი კორახაშვილმა, რომელმაც "სტერეო პლუსი" ანძიდან გათიშა, პარლამენტის საგამოძიებო კომისიას განუმარტა, რომ ამის უფლებამოსილებას ნინო ჩხეიძის მეუღლეობა აძლევდა.

ამის შესახებ ნათქვამია კომუნიკაციების ეროვნული კომისიის შემსწავლელი პარლამენტის დროებითი საგამოძიები კომისიის დასკვნაში, რომელიც შემდგომი რეაგირებისთვის მთავარ პროკურატურას გადაეგზავნა. 200-გვერდიან დოკუმენტში ერთი თავი 2012 წელს "სტერეო პლიუსისა" და "პირველი სტერეოს" ირგვლივ განვითარებულ მოვლენებს ეთმობა.

როგორც საგამოძიებო კომისია აღნიშნავს, მის მიერ მოკვლეული მასალების მიხედვით გამოვლენილი დარღვევების უმრავლესობა ტოვებს საფუძვლიან ეჭვს, რომ მიზეზი მარეგულირებელი კომისიის საქმიანობაში ხელისუფლების პირდაპირი ჩარევა ან მითითება იყო. სახელისუფლო ჩარევის კლასიკურ მაგალითად კი, "სტერეო პლუსისა" და "პირველი სტერეოს" საქმეებია მითითებული.

დოკუმენტში ნათქვამია, რომ არსებობდნენ მარეგულირებელი კომისიის თავმჯდომარისთვის (იგულისხმება ირაკლი ჩიქოვანი) "მისაღები" ლიცენზიანტები და ავტორიზებული პირები. შესაბამისად, მათთვის იქმნებოდა "სასათბურე პირობები", ხოლო "შავ სიაში" მყოფ კომპანიებს არ ეპატიებოდათ მცირე გადაცდენაც და დაუყოვნებლივ ჯარიმდებოდნენ.

საგამოძიებო კომისიის ყურადღება მიიქცია ერთ-ერთმა ფარულმა ჩანაწერმა, რომელიც კომუნიკაციების ეროვნული კომისიის მაუწყებლობის რეგულირების დეპარტამენტის ყოფილმა ხელმძღვანელმა გიორგი რატიშვილმა წარადგინა. მისი განმარტებით, ჩანაწერი ასახავდა მარეგულირებელი კომისიის ერთ-ერთი წევრის კარლო კვიტაიშვილისა და შინაგან საქმეთა სამინისტროს წარმომადგენლის ზურაბ კოტარიას საუბარს. დიალოგის შინაარსიდან ირკვევა, რომ მარეგულირებელი კომისია ელოდება ინსტრუქციას სამართალდამცავი ორგანოების წარმომადგენელისაგან, თუ როგორ უნდა მოიქცნენ შპს "პირველი სტერეოს" სიგნალთან დაკავშირებით.

პარლამენტის საგამოძიებო კომისიამ 25 სექტემბერს, საჯარო სხდომაზე, კომპანიების "სტერეო პლუსისა" და "პირველი სტერეოს" დამფუძნებელი დავით ზილფიმიანი მიიწვია. ზილფიმიანის განმარტებით, მისი კუთვნილი კომპანიების საქმიანობაში ხელშეშლა განხორციელდა დავით ბეჟუაშვილის ინტერესებიდან გამომდინარე, კანონის მოთხოვნათა საწინააღმდეგოდ.

"ყველაფერი კი მარტივად მოხდა. ვინმე, მოქალაქე გიორგი კორახაშვილი და მისი მეგობრები ავიდნენ ანძაზე და იძულებით გამორთეს კომპანიის სიგნალი. აღნიშულ ფაქტზე საუბრობდა ბატონი ზილფიმიანი, მას ადასტურებს ანძის წარმომადგენელი ბორის ადამია და თავად ბატონი კორახაშვილი, რომელმაც ჩვენს კითხვაზე, თუ რა უფლებამოსილების ფარგლებში მოქმედებდა გვიპასუხა, რომ ნინო ჩხეიძის მეუღლეა და ეს აძლევს უფლებამოსილებას", – ნათქვამია კომისიის მიერ გამოქვეყნებულ დასკვნაში.

საკითხის დაზუსტების მიზნით საგამოძიებო კომისიამ შპს "საქართველოს ტელერადიოცენტრიდან" გამოითხოვა ინფორმაცია 2012 წელს "სტერეო +" - ის გამორთვის სამართლებრივი საფუძვლების შესახებ. კომპანიის 2013 წლის 1 ივლისის კორესპონდენციით ირკვევა, რომ ზემოაღნიშნული ქმედებების სამართლებრივი საფუძველი იყო მარეგულირებელი კომისიის მიერ მიღებული გადაწყვეტილებები. 2012 წლის 7 ივნისს მარეგულირებელმა კომპანიისგან მოითხოვა: შპს "სტერეო +"-ის კუთვნილი და მთაწმინდის სატელევიზიო ანძაზე განთავსებული აპარატურის გათიშვა, რომელიც მუშაობდა 66.8 – 68.0 მჰც და 71.0. მჰც +3მჰც სიხშირულ დიაპაზონებში; დავალების შესრულების შესახებ, დავალების შესრულებიდან არაუგვიანეს 24 საათისა, კომისიისათვის ინფორმაციის მიწოდება და დავალების შესრულებასთან დაკავშირებით ხარჯების წარმოშობის შემთხვევაში, კომისიისთვის ხარჯთაღრიცხვის წარდგენა.

ბორის ადამიამ დაადასტურა განცხადებაში მითითებული ფაქტები და დააზუსტა, რომ გიორგი კორახაშვილი სხვა პირებთან ერთად იმყოფებოდა ანძაზე და მათ მოახდინეს "პირველი სტერეოს" სიგნალის ჩანაცვლება - ეთერში გადიოდა ტელეკომპანიის ძველი ჩანაწერები. ადამიამ ასევე გაიხსენა, რომ შინაგან საქმეთა სამინისტროს წარმომადგენლის ვაჟა ლელუაშვილის მითითებით მან გამორთო "სტერეო პლიუსის" სიგნალიც.

კორახაშვილის განმარტებით, ის იმყოფებოდა ანძაზე სიგნალის გამორთვისას, მას "2012 წლის 18 მაისს დავით ბეჟუაშვილმა (პარლამენტის წევრი) სთხოვა დახმარება, რადგან მოექცა საბოტაჟის ქვეშ ზილფიმიანის მხრიდან. ის გია ასათიანთან ერთად ავიდა ანძაზე, თავის ტექნიკურ სტაფთან ერთად ეხმარებოდა სიგნალის გამორთვას და შემდგომ კი, კონტენტის ჩანაცვლებაში".

"საგამოძიებო კომისიის მიერ სხვადასხვა წყაროებიდან მიღებული ინფორმაციიდან ნათელი ხდება, რომ შპს "პირველი სტერეოს" სიგნალის გამორთვით დაინტერესებული იყვნენ სახელმწიფო სტრუქტურების წარმომადგენლები, ერთი მხრივ, მარეგულირებელი კომისია იღებდა დირექტივებს მესამე პირისაგან, მეორე მხრივ კი ცნობილი ხდება, რომ დამუქებული შუშებით 20-მდე მანქანით უცნობი პირები იყვნენ მისული სიგნალის გამოსართავად. ნათლად იკვეთება მარეგულირებელი კომისიის საქმიანობაში ხელისუფლების ჩარევა. მთავარ პროკურატურას ეძლევა რეკომენდაცია, სხვა საქმეებთან ერთად აღნიშნული დარღვევა შეისწავლოს და დაუყოვნებლივი რეაგირება მოახდინოს", – ნათქვამია მთავარი პროკურატუსათვის გადაგზავნილ დოკუმენტში.

"ინტერპრესნიუსი"