კვლევის მიხედვით, პოტენციურ საპრეზიდენტო კანდიდატებს შორის ბიძინა ივანიშვილი ლიდერობს

"საზოგადოებრივი პოლიტიკის ინსტიტუტის" მიერ ჩატარებული კვლევის მიხედვით, პოტენციურ საპრეზიდენტო კანდიდატებს შორის ბიძინა ივანიშვილი ლიდერობს.

კითხვაზე, ხვალ რომ საპრეზიდენტო არჩევნები იყოს, რომელ კანდიდატს მისცემდით ხმას, პასუხისგან თავი შეიკავა გამოკითხულთა 50%-მა, 22,5%-მა პოტენციურ საპრეზიდენტო კანდიდატად ბიძინა ივანიშვილი დაასახელა, 7,5%-მა - გიგი უგულავა, 9,5%-მა - სხვა, აქედან 8,7%_მა მიხეილ სააკაშვილი, 3,8%-მა - დავით ბაქრაძე, 2%-მა – ირაკლი ალასანია, ხოლო 1,9%-მა - გიორგი თარგამაძე.

კვლევის ავტორების თქმით, რესპონდენტთა მესამედზე მეტმა პოლიტიკური სიმპათიის გამჟღავნებაზე უარი თქვა.

დემოგრაფიული თვალსაზრისით, ივანიშვილს უმეტესად ქალაქის მცხოვრებლები ემხრობიან – 61,9%; ხოლო "ნაციონალური მოძრაობის" მხარდამჭერებს შორის სოფლის მოსახლეობა ჭარბობს – 47,4%.

"ასევე, საკმაოდ დიდი აღმოჩნდა სკეპტიკოსთა წილი, ვინც არც ერთ პოლიტიკურ სუბიექტს მხარს არ უჭერს. რა თქმა უნდა, ისინი ჩვენს ანალიზში არ მოხვდნენ",- განუცხადა "ინტერპრესნიუსს" კვლევის ავტორმა ნანა სუმბაძემ.

კვლევა ფონდ "ღია საზოგადოება - საქართველოს" მხარდაჭერით, 21 ნოემბრიდან 19 დეკემბრამდე საქართველოს ყველა რეგიონში ჩატარდა.

როგორც ფონდის დირექტორმა, ქეთი ხუციშვილმა აღნიშნა, საინტერესოა ის ფაქტი, რომ დაახლოებით 50%-მა სხვადასხვა მიზეზით კითხვებს არ უპასუხა. "ერთნი ამბობენ, რომ უჭირთ პასუხის გაცემა პოლიტიკური ფიგურის ამორჩევისას, მეორენი ამბობენ, რომ არც ერთ პოლიტიკურ ძალას არ უჭერენ მხარს, მესამენი კი პასუხისგან თავს საერთოდ იკავებენ. პოლიტიკური პარტიებისთვის ეს იმას ნიშნავს, რომ არის ჯერ კიდევ დიდი რესურსი, რომლის სამომავლოდ გამოყენება და ამა თუ იმ მხარეს მხარდამჭერად მიზიდვა შეიძლება", - განაცხადა ქეთი ხუციშვილმა.

კვლევის - "ელექტორატის პროფილი" - ფარგლებში გამოიკითხა სამი ასაკობრივი ჯგუფი – 18-24; 40-50; 60-70. შერჩევა ჩატარდა იერარქიული, შემთხვევითი, წინასწარი შერჩევის მიხედვით – ინტერვიუერი შედიოდა დასახლების საწყის წერტილად წინასწარ შერჩეული ადგილიდან ყოველ მეხუთე სახლში. ავტორების განცხადებით, გამოკითხვის სირთულეს წარმოადგენდა რესპონდენტთა ინტერვიუზე დათანხმება, განსაკუთრებით თბილისში, სადაც ინტერვიუერებს ხშირად კარს არ უღებდნენ.

"ინტერპრესნიუსი"