14
აპრილიდღის ზოგადი ასტროლოგიური პროგნოზი
"სახალხო კრებამ" პოლიტიკური პროცესი გააცოცხლა, გააჩინა შანსი, რომ ქვეყანაში რაღაც რეალურად შეიცვალოს. საქართველოში მხოლოდ ის ოპოზიცია რომ იყოს, რომელიც 2012-2013 წლებისთვის ემზადება, გარწმუნებთ, 2033 წლამდე სააკაშვილი და მისი გარემოცვა იქნებიან ხელისუფლებაში. ყველაფერი დამოკიდებული იქნება იმაზე, როგორი განწყობით მოვლენ "სახალხო კრებაზე" ჩვენი მოქალაქეები და იქნებიან თუ არა მზად თავიანთი ამოცანის შეუპოვრად შესრულებისათვის", - ამბობს "დემოკრატიული მოძრაობის" ლიდერი და "სახალხო კრების" ერთ-ერთი ინიციატორი ნინო ბურჯანაძე:
- ხელისუფლებას შეეშინდა "სახალხო კრებისა" და ყველა ღონე იხმარა, რომ ჩვენთვის დარბაზი არ მოეცა. რუსთაველის პროსპექტზე კრების ჩატარება გაცილებით ძნელი იქნება, ვიდრე დახურულ დარბაზში, მაგრამ იმედია, საზოგადოება გააცნობიერებს, რამდენად დიდი მნიშვნელობა აქვს კრებას და დაგვეხმარებიან ისე დასრულდეს, რომ ჩარჩოდან არ ამოვარდეს. კრება 3 საათზე დაიწყება და მაქსიმუმ 2 საათს გაგრძელდება. კრების შემდეგ მიტინგი გაიმართება თუ აქცია, ეს სხვა საკითხია.
თავად ხელისუფლებამ გვაიძულა, რუსთაველის პროსპექტზე დაგვენიშნა შეკრება, რადგან არ ელოდა კრებაზე ბევრი ხალხის მოსვლას. აქამდე გეგმავდნენ, თუ 25 ნოემბერს პარლამენტის წინ 10-15 ათასი კაცი მოვიდოდა, მოეწყოთ პროვოკაცია, 10-15-ათასკაციან შეკრებას ძალზე ადვილად დაარბევდნენ. მერე პროვოკაციას მიტინგის ორგანიზატორებს გადააბრალებდნენ, რასაც მოაყოლებდნენ რეპრესიებს და ამით საპროტესტო ტალღას ჩაკლავდნენ. ახლა ეს პროვოკაცია ხელისუფლებას აღარ გამოუვა, რადგან დარწმუნებული ვარ, გაცილებით მეტი ხალხი მოვა და ჩვენც ყველაფერს გავაკეთებთ, რომ პროვოკაცია არ გაუვიდეთ.
- მაგრამ ვიღაცამ რომ დაიძახოს, პარლამენტში შევცვივდეთო და ხალხიც აჰყვეს?
- კრებაზე იქნება ე. წ. უსაფრთხოების ჯგუფი, რომელიც ამას არ დაუშვებს. არც იმას გამოვრიცხავ, რომ პროვოკაციისთვის ხელისუფლებამ გულწრფელად აღშფოთებული ადამიანებიც გამოიყენოს. ვიცი, რომ ხელისუფლება 25 ნოემბრისთვის საგანგებოდ ემზადება. ემზადოს, რამდენიც უნდა. ხალხის პროტესტს ვერ ჩაახშობს. თუ მოსახლეობის დიდი ნაწილი გადაწყვეტს, რომ აღარ უნდა ეს ხელისუფლება, ხელისუფლება ხალხის ნებას წინ ვერ აღუდგება, ხოლო, თუ მოსახლეობა გაჩუმდება და სამზარეულოში გააგრძელებს წუწუნს, რა ცუდი მთავრობა გვყავსო, ხელისუფლება კიდევ დიდხანს შეინარჩუნებს ძალაუფლებას.
ძნელია "პროვოკატორობის ჩემპიონ" ხელისუფლებას შევეჯიბროთ, მაგრამ თუ პროვოკაციის მცდელობა იქნება, ჩვენც გვაქვს მექანიზმები, რომლის საშუალებითაც შევეცდებით მათ აღკვეთას.
ამის თაობაზე გაფრთხილებულია დიპკორპუსი, უამრავი წერილი გავგზავნეთ საერთაშორისო თანამეგობრობაში. პროვოკაციის შემთხვევაში პასუხისმგებლობა ხელისუფლებას დაეკისრება და ეს ძალიან ძვირად დაუჯდება.
- კრებამ ხელისუფლების გადაყენება რომ მოითხოვოს, როგორ წარმოგიდგენიათ ამის აღსრულება?
- ყველა დეტალზე არ ვილაპარაკებ, მაგრამ გეტყვით, რომ საამისოდ უამრავი ბერკეტი გვაქვს. უპირველესი კრების ლეგიტიმურობაა. თუ კრებაზე ბევრი ხალხი მოვა, ხელისუფლება იძულებული გახდება, დათმობაზე წავიდეს. არ არსებობს ხელისუფლება, რომელიც 100 ან 200 ათასი კაცის პროტესტს უგულებელყოფს. წინააღმდეგ შემთხვევაში შეიძლება ვითარება გამწვავდეს.
- 200 ათასი კაცი იდგა ქუჩაში, მაგრამ პროტესტმა უშედეგოდ ჩაიარა.
- თუ პარლამენტთან 200 ათასი კაცი მოვა, მათ უკან კიდევ რამდენიმე ასეული ათასი იგულისხმება. გარდა ამისა, უწინ ოპოზიციის მარცხის მიზეზი ლიდერებში ერთსულოვნების არარსებობა იყო, რაც საქმის ბოლომდე მიყვანას უშლიდა ხელს. როდესაც ერთი ლიდერი ამბობდა, ყველაფერი გავაკეთოთ ხელისუფლებაზე ზეწოლისთვისო, მეორე ხელისუფლებასთან შეხვედრაზე გარბოდა გაუგებარ მოლაპარაკებაზე და როდესაც იქიდან ცარიელი ხელებით ბრუნდებოდა, ამბობდა, კიდევ წავალ შემდეგ მოლაპარაკებაზეო.
ასეთ ვითარებაში, ბუნებრივია, გაძნელდებოდა მიზნის მიღწევა. დღეს კრების ხელმძღვანელობაში ისეთი ადამიანები არიან, რომლებიც უკან დახევასა და ხალხის მოტყუებას არ აპირებენ, მაგრამ არც ხალხის ნაცვლად მიიღებენ კონკრეტული მოქმედებების შესახებ გადაწყვეტილებას. ხალხმა უნდა გვითხრას, რა უნდა.
როდესაც ამათ მორალზე ველაპარაკებოდი და ვცდილობდი, მათში მორალური კატეგორიები გამეღვიძებინა, ცდა უშედეგოდ დასრულდა. ამიტომაც ხელისუფლებას მხოლოდ ხალხის ძალით, უფრო სწორად, ხალხის ერთობის ძალით დაველაპარაკები.
- 26 მაისი გამახსენდა. ხალხმა რომ გითხრათ, დღესვე გადავაყენოთ ხელისუფლებაო, სად წაიყვანთ ეგზალტირებულ ხალხს?
- ჩვენ ხალხს არ ვატყუებთ და არ ვამბობთ, 25-ში კრება რომ ჩატარდება, 26 ნოემბრის დილას საქართველო სააკაშვილის გარეშე შეხვდებაო. 25 ნოემბრიდან იწყება გადამწყვეტი ბრძოლა საქართველოს დემოკრატიული მომავლისათვის, რომელიც აუცილებლად დამთავრდება საქართველოს მოსახლეობის გამარჯვებით და სააკაშვილის ხელისუფლების წასვლით, ოღონდ გონივრული მოქმედებაა საჭირო.
- სალომე ზურაბიშვილსაც არ აკლდა შემართება, დღეს კი პოლიტიკიდან წავიდა.
- ოპოზიციონერობას აზრი სწორედ მაშინ აქვს, როდესაც ქვეყანაში რეჟიმი და სირთულეებია. თუ ქვეყანაში კარგად არის ყველაფერი, მაშინ შეიძლება დაფიქრდე, ოპოზიციაში იყო თუ საყვარელი საქმე აკეთო.
ქალბატონ სალომეს შევხვდი, სანამ პოლიტიკიდან წასვლაზე გააკეთებდა განცხადებას. მაშინ ვუთხარი, რომ მიუხედავად რიგ საკითხებში განსხვავებული შეხედულებებისა, მისი წასვლა პოლიტიკიდან დანაკარგი იქნებოდა სააკაშვილის წინააღმდეგ ბრძოლაში, მაგრამ ეს მისი გადაწყვეტილებაა და წარმატებას ვუსურვებ.
- "ფორუმი" "სახალხო კრებას" აქამდე სკეპტიკურად უყურებდა, ახლა რის გამო გადაწყვიტა კრებასთან შეერთება?
- მე უფრო უცნაურად ის მიმაჩნდა, "ფორუმი" უარს რომ ამბობდა "სახალხო კრებაში" აქტიურად ჩართვაზე. ვფიქრობ, "ფორუმის" ხელმძღვანელობამ სწორად შეაფასა "სახალხო კრების" ძალა და ის, რომ მათი მოსვლით "სახალხო კრება" კიდევ უფრო გაძლიერდება.
- "ქართულ პარტიასთან" ერთი შეხედვით არცთუ თბილი ურთიერთობა გაქვთ? ოქრუაშვილმა თქვენი ამბიციები ახსენა.
- რომელ ამბიციაზეა ლაპარაკი, როდესაც "ქართული პარტიის" დამფუძნებლებმა შემომთავაზეს, მათი პარტიის თავმჯდომარე და საპრეზიდენტო კანდიდატი ვყოფილიყავი. მათ წინადადებას ვაფასებ, მაგრამ ჩვენ ბევრ საკითხზე განსხვავებული ხედვა გვაქვს.
გარდა ამისა, უკვე ვარ ერთი პარტიის თავმჯდომარე და მყავს გუნდი, რომელთანაც იდეური თანხვედრა მაქვს. მათ უარი ვუთხარი კოალიციაზეც. ეჭვი არ მეპარება, ბატონ ირაკლი ოქრუაშვილს ძალიან უნდა ხელისუფლების შეცვლა, მაგრამ როდესაც სიტუაციას შორიდან უყურებ, ბევრი რამ სხვაგვარად ჩანს. ვფიქრობ, ბატონმა ირაკლიმ შორიდან კარგად ვერ დაინახა "სახალხო კრების" რეალური ძალა.
იზო რიკაძე
ყოველკვირეული გაზეთი "კვირის პალიტრა"
(გამოდის ორშაბათობით)
