11
აპრილიდღის ზოგადი ასტროლოგიური პროგნოზი
15 ივლისს ბელორუსიის ტელე-ეთერში საქართველოს პრეზიდენტ მიხეილ სააკაშვილის ექსკლუზიური ინტერვიუ გავიდა, რომელიც მან ქვეყნის სახელმწიფო ტელევიზიის "ახალი ამბების სააგენტოს" კორესპონდენტ დენის კურიანს მისცა.
კითხვები ასეთი იყო: შესაძლოა თუ არა თბილისისა და მოსკოვის შერიგება? როდის შევა საქართველო ევროკავშირში? რომელ საკვებზე ამბობს პრეზიდენტი სააკაშვილი უარს და რაზე ბრაზდებიან მისი ნათესავები?
ისაუბრეს საქართველოს ბელორუსთან და ევროკავშირთან ურთიერთობებზე, ასევე საქართველოს ნატოში გაწევრიანების პერსპექტივებზე.
რაც შეეხება რუსეთ-საქართველოს ურთიერთობებს, პრეზიდენტმა სააკაშვილმა განაცხადა, რომ მისთვის გაუგებარია რუსეთის დამოკიდებულება საქართველოსადმი.
"ძნელი გასაგებია, რა უნდათ, ჩვენ ყოველთვის ვცდილობთ რუსეთის ფედერაციასთან ურთიერთობის მოგვარებას, თუმცა როცა გარკვეულ დათმობაზე მივდივართ, მათ სულ უფრო მეტი და მეტი უნდათ", - განაცხადა სააკაშვილმა.
"რუსეთს საქართველოსთან მიმართებაში შანტაჟის პოლიტიკა აქვს არჩეული - თქვენ შეცვლით თქვენს დამოკიდებულებას, შეასრულებთ ყველა ჩვენს მოთხოვნას, აი მაშინ კი ვნახოთ. აი ასეთია მათი პოლიტიკა", - აღნიშნა სააკაშვილმა.
მიუხედავად იმისა, რომ საქართველოს პრეზიდენტმა ინტერვიუში რუსეთის პოლიტიკა გააკრიტიკა, განაცხადა, რომ რუსი ხალხისა და რუსული კულტურის მიმართ დიდი პატივსცემითაა გამსჭვალული.
"მე ყოველთვის ვამბობდი, რომ შესაძლოა საქართველოს ბოლო ან ბოლოს წინა პრეზიდენტი ვარ, რომელიც პუშკინის, ლერმონტოვის, ბროდსკისა და ესენინის სიტყვებს უკეთებს ციტირებას. თუმცა გავა დრო, წავა ძველი თაობა და ახალ თაობას აღარც კი ეცოდინება, რა არის, ან სად არის რუსეთი" - განაცხადა სააკაშვილმა.
პრეზიდენტმა ისიც აღნიშნა, რომ საკუთარ შვილს, მიუხედავად მისი პროტესტისა, რუსულის სწავლას მაინც აიძულებს.
რაც შეეხება ბელორუსისა და საქართველოს ურთიერთობას, სააკაშვილის თქმით, ბელორუსი საქართველოს ყოველთვის მხარს უჭერდა და არასოდეს უთქვამს უარი ქართული პროდუქციის ექსპორტზე.
"მაშინ როდესაც რუსეთმა ქართული ღვინის ექსპორტი აკრძალა და მინსკში გამართულ დსთ-ს სამიტზე ჩავედი, იქ სტუმრებს ქართული ღვინით უმასპინძლდებოდნენ, რომელსაც რუსი ლიდერები დიდი სიამოვნებით სვამდნენ", - აღნიშნა სააკაშვილმა.
ბელორუსიის ტელევიზიით მიხეილ სააკაშვილის ინტერვიუს ტრანსლირება უკვე გააკრიტიკა რუსეთის სახელმწიფო დუმის სპიკერმა ბორის გრიზლოვმა. მისი თქმით, მას შემდეგ რაც ბელორუსის ტელევიზია სააკაშვილს ეთერში ეპატიჟება, რუსეთისაგან მეგობრულ ურთიერთობას არ უნდა ელოდოს.
"რუსეთისთვის ბატონი სააკაშვილი პერსონა ნონ-გრატაა, მასთან არანაირი ურთიერთობა არ გვაქვს და არც შეიძლება გვქონდეს. რუსეთ-საქართველოს შორის ურთიერთობები მხოლოდ მას შემდეგ მოგვარდება, როცა ქვეყანას სხვა ლიდერი ეყოლება", - განაცხადა გრიზლოვმა.
მომზადებულია topnews.ru-ს მიხედვით.
