Українська революція: "მიხეილ სააკაშვილი მოსამართლეებს აშანტაჟებს"

საინფორმაციო-ანალიტიკური გამოცემა Українська революція-ს ინფორმაციით, მოიპოვეს მიმოწერა, რომელიც ოდესის ყოფილ გუბერნატორ მიხეილ სააკაშვილსა და უკრაინის გენპროკურორის ყოფილ მოადგილე დავით საყვარელიძეს შორის შედგა. საიტი სააკაშვილი-საყვარელიძის სტენოგრაფიულ ჩანაწერს ორ ენაზე - რუსულად და ქართულად აქვეყნებს.

გამოცემა ასევე აქვეყნებს "ვაიბერში" მიმოწერის სქრინებს, რომელიც მათი მტკიცებით, სააკაშვილსა და საყვარელიძეს შორის შედგა. დიალოგი ეხება ვიცე-პოლკოვნიკ გია ცერცვაძის საქმეს. სააკაშვილი ინტერესდება, როგორ მიმდინარეობს ცერცვაძის გათავისუფლებაზე მუშაობა და რა წინსვლა აქვს ამ საკითხში საყვარელიძეს.

"მეც ველაპარაკე ვიღაცეებს. პიარის კუთხით მაქსიმალურად უნდა გავაქტიურდეთ, რომ გივის არ მიეწეროს ეს ყველაფერი. მემგონი ვერ გაბედავენ და გამოუშვებენ, ამიტომ შენც უნდა გამოჩნდე ხშირად, რომ ჩვენ მივიწეროთ ბოლომდე ცერცვაძეს გამოშვება. ისე ეს თემა მაგარი აწია გვარამიამ და კიდევ დაგვეხმარება", - ვკითხულობთ სტენოგრაფიულ ჩანაწერში სავარაუდოდ სააკაშვილის სიტყვებს.

ამის შემდეგ, საყვარელიძე საუბარში ორ გვარს ახსენებს, რომელთაც "თბილისში ამანათები გაეგზავნათ". მოხსენიებული პიროვნებები, სავარაუდოდ, საქართველოს უზენაესი სასამართლოს მოსამართლეები - ბესარიონ ალავიძე და პაატა ქათამაძე არიან, რომლებიც "რუსთავი 2"-ის საქმეს განიხილავენ.

"ბიჭები ჩამოვიდნენ თბილისიდან. მოკლედ, იმ ალავიძეს და ქათამაძეს გაეგზავნათ ამანათები და ჩაიბარეს, იქ როგორც ვთქვით, დავუდასტურეთ, რომ თქვენ ხართ ჩვენი იმედი, მომავალი გარანტირებული გაქვთ ყველანაირად ასეც და ისეც, კარიერულად ერთი მინისტრად, მეორე თავმჯდომარედ და რაღაც განსაკუთრებული კი არ გევალებათ მოკლედ თემა უნდა ააფეთქოთ-თქო. ზეწოლის, თვალთვალის, დატერორების და დაშინების რეჟიმში გვამყოფებენ და აღარ ავიტანთ ამასთქო. ოდნავ გაახმოვანეთ და ან თუნდაც გარეთ გამოაჟონინეთ მაგ ინფორმაციას და დანარჩენს გვარამია მიხედავსთქო. მაგათი ამბავი ზოგადადაც ხომ ხედავთ წასულია თქო. თან გმირები და ხელშეუხებლებიც გამოხვალთთქო. მერე ტელეფონითაც მივანიშნე, რომ ჩვენ ვართ რომ არ შეშინებულიყვნენ. გვარამიასაც ყველანაირად ეიმედება და თავისი ხაზით კონტაქტზეა.რაც მთავარია, ორივენი ამ უნიათოების მთავრობას ვერ იტანენ და ჩვენი მომხრეები არიან. უყურებენ ჩამოეშალათ თავზე სასამართლოც და ისედაც ანგრევენ ქვეყანას" - ვკითხულობთ სტენოგრაფიულ ჩანაწერში სავარაუდოდ, საყვარელიძის სიტყვებს.

საყვარელიძე დიალოგში კიდევ ერთ ადამიანს ასახელებს - სავარაუდოდ, ადვოკატთა ასოციაციის თავმჯდომარე ზაზა ხატიაშვილს:

"ჯერ შემადგენლობაც არ დასახელებულა. როგორც კი დაასახელებენ იმათაც წავემუშავებით, ვისთანაც აზრი აქვს. ვისთანაც არა და ვინც დაგვაპაშოლებს, უნდა გავაშაოთ ბოლომდე. პიარს გვარამია მიხედავ და გააფორმებს.ეგენი ხომ იცი კიდევ ღამურებივით არიან ოღონდ საჯაროდ არ გამოაჭენო და მიკროფონი არ დაანახო, ხმას ვერ ამოიღებენ. ადვოკატების თავმჯდომარე ზაზაც მზადაა, რომ ბოლომდე გადაუაროს მაგათ, ენჯეოებიც მომართულნი არიან და მოკლედ მთელი ორკესტრი ამუშავდება", - ვკითხულობთ ჩანაწერში, სავარაუდოდ, საყვარელიძის სიტყვებს.

აღსანიშნავია, რომ საიტზე uarevo.in.ua მიხეილ სააკაშვილს რამდენიმე სტატია ეძღვნება. მათ შორის არის სტატიები სააკაშვილისა და მისი ბიძის, თემურ ალასანიას კავშირზე სირიაში იარაღით ვაჭრობასთან და მოსყიდული ჟურნალისტების დაფინანსებასთან დაკავშირებით.

წყარო: uarevo.in.ua