პრემიერ-მინისტრის პასუხები და მესიჯები ჟურნალისტებთან შეხვედრიდან

საქართველოს პრემიერ-მინისტრი გიორგი კვირიკაშვილის შეხვედრა საერთო-ეროვნული მაუწყებლების პოლიტიკური თოქ-შოუების წამყვანებთან კითხვა-პასუხის რეჟიმში მიმდინარეობს.

გთავაზობთ რამენიმე მნიშვნელოვან მესიჯს პრემიერ-მინისტრის პასუხებიდან:

გიორგი კვირიკაშვილის განცხადებით, არჩევნებთან დაკავშირებით ახალი განკარგულების მაისში გამოცემის შესახებ პრეზიდენტის პოზიცია არ შეიძლება კონფრონტაციად შეფასდეს.

"სამწუხაროდ, პრეზიდენტმა გააკეთა განცხადება, რომ ის მომხრეა მაისში დაიწყოს საარჩევნო კამპანია. არ დაგიმალავთ, აქ იყო გარკვეული გაუგებრობა, მაგრამ არამგონია, ეს რაიმე კონფრონტაციად შეფასდეს", - განაცხადა პრემიერმა.

***

"რაც შეეხება რესპუბლიკელი" მინისტრების ყოფნას მთავრობაში - არ ვაპირებ მათ გათავისუფლებას. კანონით არის გათვალისწინებული ვადები: ეს არის ერთთვიანი ვადა. თუ ისინი მოისურვებენ საარჩევნო სიაში ყოფნას, ამ პერიოდისთვის სავარაუდოდ თვითონ მიიღებენ გადაწყვეტილებას. ჩვენ ვართ პარტნიორობის და კონკურენციის რეჟიმში. ვფიქრობ, ძალიან საინტერესოა ასეთ რეჟიმში მუშაობა და არ მგონია ამაზე დამატებითი კომენტარების გაკეთება იყოს მიზანშეწონილი", - განაცხადა პრემიერ-მინისტრმა.

***

როგორც პრემიერმა აღნიშნა, ივანიშვილის ფაქტორი დღევანდელ პოლიტიკაში ძალიან მნიშვნელოვანია. მას ივანიშვილთან აქვს ძალიან ნორმალური, კონსტრუქციული ურთიერთობა.

"მე ყოველთვის მქონდა მასთან ღია, გულწრფელი ურთიერთობა.არასდროს ვერიდებოდი მასთან დებატებს და არაერთ საკითხზე მქონია ძალიან მწავავე კამათი - მისი მხრიდანაც არასდროს ყოფილა ეს უარყოფითად მიღებული", - განაცხადა პრემიერმა.

***

"მინისტრებს ნამდვილად არ უნდა ჰქონდეთ საყოველთაო ჯანდაცვის პაკეტი, მე კერძო ჯანდაცვის პაკეტი მაქვს, იმ მოქალაქეებმა, რომლებსაც შეიძლება ჰქონდეთ შესაძლებლობები, რომ საკუთარი ჯანდაცვა თავადვე დააფინანსონ, შედარებით მოკრძალებული პაკეტით უნდა ისარგებლონ. ასეთი მოდიფიკაციები დაწყებულია და ეს გადაჭრის იმ პრობლემას, რაც ითქვა. მედიკამენტების დაფარვა იქნება უფრო ფართო და იმ ადამიანებისთვის უფრო მეტად, ვისაც საჭიროება გააჩნია. ამას ემატება კერძო და საჯარო სექტორს შორის პარტნიორობის მოდელი. ამან მნიშვნელოვანწილად მოიტანა შედეგი, როცა მედიკამენტების გაიაფება დაიწყო და ასეც გაგრძელდება", - აღნიშნა პრემიერმა და დასძინა, რომ საქართველოში ახალი ფარმაცევტული საწარმოების მშენებლობა იგეგმება.

***

"მე ვიქნები გარანტი, რომ ადამიანების საძინებლებში ძრომიალი დამთავრდება", - ამის შესახებ საქართველოს პრემიერ-მინისტრმა გიორგი კვირიკაშვილმა ბოლო დროს პირადი ცხოვრების ამსახველი კადრების გავრცელების კომენტირებისას აღნიშნა. ამასთან, პრემიერი მოსახლეობას დაჰპირდა, რომ ამაზრზენი კადრების საჯარო ჩვენება (რაც ხდებოდა) მისი პრემიერობის პერიოდში აღარ მოხდება.

***

"უახლოეს მომავალში თქვენ იხილავთ არაერთ ახალგაზრდა პროფესიონალს ჩვენს რიგებში, რომლებიც მნიშვნელოვან წვლის შეიტანენ ქვეყნის რეფორმირების და სწრაფი განვითარების პროცესებში. ეს არ გულისხმობს ვინმეს წვლილის იგნორირებას - ძალიან მნიშვნელოვანი იყო ძველი გუნდის როლი წინა არჩევნებში, რათა საქართველოს მოეხდინა მნიშვნელოვანი ცვლილებები ქვეყანაში", - განაცხადა კვირიკაშვილმა.

***

მე არ ვიტყოდი, რომ არ ვენდობი NDI -ის კვლევის შედეგებს. კვლევაში არის მნიშვნელოვანი კომპონენტები, რომელიც ჩემთვის ძალიან საინტერესოა. თუმცა არის გარკვეული მომენტები, როდესაც მე შესაძლოა სხვა განცდები მქონდეს, იგივე "ქართული ოცნების" მხარდამჭერთა პროცენტულ რაოდენობასთან მიმართებაში და იმასთან მიმართებაში, რაც ეხება სხვადასხვა პირების პოპულარობას, თუ არაპოპულარობას.

***

პრემიერმა ჟურნალისტებთან შეხვედრაზე განათლების სისტემაზეც ისაუბრა და განაცხადა, რომ "ჩვენი განათლების სისტემა პირდაპირ აწარმოებს უმუშევარ ადამიანებს". კვირიკაშვილმა საკუთარი შვილების მაგალითი მოიყვანა და განაცხადა, რომ ვერ შეძლო შვილების გადარწმუნება პროფესიის არჩევასთან დაკავშირებით. პრემიერმა აღნიშნა, რომ ბევრი ადამიანი დღეს რჩება უფუნქციო და უმუშევარი და საჭირო ხდება მათი გადამზადება. როგორც მან აღნიშნა, აქ რადიკალური ცვლილებებია საჭირო.

***

"სამართლიანობის აღდგენა, ალბათ, ერთ-ერთი ყველაზე რთული საკითხია, რომელიც შეიძლება გამოწვევად რჩებოდეს ჩვენს წინაშე. მე არ დაგიმალავთ, რომ ემოციურად ბევრჯერ მქონია მომენტი, როცა სხვა გადაწყვეტილების მიღების სურვილი მქონია, მაგრამ, სამწუხაროდ, სახელმწიფო ბიუროკრატიას გააჩნია თავისი სამართლებრივი ჩარჩოები. მეც გამაჩნია განცდა, რომ შესაძლოა ეს პროცესი დასაჩქარებელი იყოს და ამ მიმართულებით ჩვენ გადავდგამთ ნაბიჯებს, მაგრამ კიდევ ერთხელ ვამბობ, სახელმწიფოს ყოველთვის გააჩნია სამართლებრივი ჩარჩოები. გეთანხმებით, დღეს ბევრი ადამიანი ცხოვრობს იმის შეგრძნებით, რომ მის მიმართ სამართლიანობა დარღვეულია. პირობას ვიძლევი, რომ მაქსიმალურად შევეცდებით, ეს პროცესი დავაჩქაროთ", - განაცხადა პრემიერ-მინისტრმა.

შეხვედრაზე პრემიერმა ძალოვან უწყებებში განხორციელებულ ცვლილებებზე ისაუბრა და გადაჭარბებული უწოდა ინფორმაციას, რომლის მიხედვითაც შსს-ში გრძელდება მოქალაქეებზე ფიზიკური ზეწოლისა და სუსის მხრიდან თვითმმართველობის ორგანოებზე ზემოქმედების ფაქტები.