"ხომ ყველა დავეტიეთ " - პარლამენტში მისული მარგველაშვილის პასუხი ეკა ბესელიას

"ხომ ყველა დავეტიეთ" - ასე მიმართა გიორგი მარგველაშვილმა ეკა ბესელიას პარლამენტის სხდომათა დარბაზში შესვლისას.

საქართველოს პრეზიდენტი პარლამენტში ევროკავშირთან ასოცირების ხელშეკრულების რატიფიკაციისადმი მიძღვნილ სხდომაზე მივიდა. მანამდე კი ვრცელდებოდა ინფორმაცია, რომ პრეზიდენტი რიგგარეშე სესიაზე მიწვეული არ იყო.

სხდომის დასრულების შემდეგ პრეზიდენტი და ეკა ბესელია დარბაზიდან ერთად გამოვიდნენ. ჟურნალისტების კითხვაზე თუ რას გულისხმობდა ბესელიას მისამართით ნათქვამ რეპლიკაში, მარგველაშვილმა კონკრეტული კომენტარისგან თავი შეიკავა და ღიმილით უპასუხა, რომ ის და ეკა ბესელია "ევროპის ტერიტორიაზე" მოძრაობდნენ.

შეგახსენებთ, მანამდე ჟურნალისტების კითხვაზე, უნდა ესწრებოდეს თუ არა პრეზიდენტი დღევანდელ სხდომას, ადამიანის უფლებათა დაცვის კომიტეტის თავმჯდომარემ, ეკა ბესელიამ უპასუხა: "ამ დარბაზში იქნება თუ არა დღეს სრულად წარმოდგენილი საქართველოს ხელისუფლება, მე ვგულისხმობ მის შტოს, ეს არ განაპირობებს იმას, რომ კითხვის ნიშნის ქვეშ დადგეს ერთსულოვნება. დღეს ეს დარბაზი ყველას ვერ დაიტევს ფიზიკურად, მაგრამ დარწმუნებული ვარ, დღეს არა მარტო სახელისუფლებო გუნდი არის ერთსულოვანი, არამედ საქართველოს მოსახლეობის დიდი ნაწილი. აბსოლუტურად არანაირი პრობლემა არ არის. მხარდაჭერას იმის მიხედვით ნუ განვსაზღვრავთ, ვინ შემოვა პარლამენტის დარბაზში", -განაცხადა ეკა ბესელიამ ჟურნალისტებთან საუბარში.

ვიდეო

ასევე იხილეთ:

პოლიტიკოსები საზეიმო ღონისძიებაზე - როგორ აღნიშნეს ასოცირების ხელშეკრულების რატიფიცირება პარლამენტში

ასოცირების ხელშეკრულება რატიფიცირებულია - პრეზიდენტის სიტყვით გამოსვლა პარლამენტში

ევროკავშირთან ასოცირების შეთანხმება რატიფიცირებულია