პრეზიდენტობიდან პრეზიდენტის მრჩევლობამდე - "გინდა შალახო იცეკვოს, სააკაშვილის ეპოქა დამთავრდა!"

საქართველოს ყოფილი პრეზიდენტი მიხეილ სააკაშვილი და ეკონომიკის ყოფილი მინისტრი კახა ბენდუქიძე, შესაძლოა, უკრაინის ახლადარჩეული პრეზიდენტის, პეტრე პოროშენკოს მრჩევლები გახდნენ. ამის შესახებ პარტია "უდარის" ლიდერმა და კიევის მერის არჩევნებში გამარჯვებულმა ვიტალი კლიჩკომ განაცხადა.

Ambebi.ge სააკაშვილისა და ბენდუქიძის პორეშენკოს მრჩეველთა გუნდის შესაძლო წევრობასთან დაკავშირებით ქართული რეაქციებით დაინტერესდა. შეუქმნის თუ არა მიხეილ სააკაშვილის ფაქტორი პეტრე პოროშენკოს პრობლემებს რუსეთის ხელისუფლებასთან ურთიერთობების მოწესრიგებაში და თუ გააჩენს იგივე ფაქტორი უკრაინისა და საქართველოს ხელისუფლებებს შორის ურთიერთობებში უხერხულობას. ჩვენ  ლევან ბერძენიშვილს, მამუკა ღლონტს, სოსო ცინცაძესა და თეა თუთბერიძეს ვესაუბრეთ.

ლევან ბერძენიშვილი, საპარალამენტო უმრავლესობის წევრი:

- ვისაც ვინ უნდა, იმას აიყვანს მრჩევლად. ვერავინ ვერასდროს ვერავის ურჩევს, თუ ვინ უნდა ჰყავდეს მრჩევლად.

- სააკაშვლის პეტრე პოროშენკოს მრჩევლად დანიშვნის შემთხვევაში, გააჩენს თუ არა ეს ფაქტორი უხერხულობას საქართველოს ხელისუფლებასა და უკრაინის ახალ მთავრობას შორის.

- მრჩეველი და ოფიციალური ურთიერთობები არის სხვადასხვა რამ, და ამიტომ არ გააჩენს უხერხულობას. მერწუნეთ, არანაირი პრობლემა უკრაინასთან ამის გამო არ გვექნება; დარწუნებული ბრძანდებოდეთ ამაში, და სიმართლეს გითხრათ, სააკაშვილი მრჩევლად არ გამოადგება არავის. სააკაშვილი როგორც პედაგოგად გამოადგა ვინმეს? ისე გამოადგება მრჩევლადაც...

- ვიტალი კლიჩკომ განაცხადა, რომ  სააკაშვილმა თავად მოახდინა თანამშრომლობის ინიცირება... ხომ არ ფიქრობთ, რომ სააკაშვილი აპირებს თავი დაიმკვიდროს უკრაინის ხელისუფლებაში რაიმე ფორმით?

- ყოფილი პრეზიდენტები თავს რაღაცნაირად იმკვიდრებენ, მაგრამ ისინი არიან უმნიშვნელო ფიგურები. სააკაშვილი თუ საქართველოსთან არ არის დაკავშირებული, კაპიკია მისი ფასი, მაგრამ ყველას აქვს უფლება, რომ მას, როგორც მრჩეველს მოუსმინოს, და თავისი წილი გაოგნებისა მიიღოს სხვამაც, მარტო ჩვენ არა ვართ გაოგნებულები... პრობლემა არ არის, მგონი ამას იუმორით უნდა შევხედოთ, პირველი აპრილის ხუმრობას უფრო ჰგავს...

- ხომ არ არის ეს ერთგვარი დივიდენდი სააკაშილისთვის მეიდანზე აქტიურობისთვის?

- სააკაშვილის ფასი პოლიტიკური არის დაბალი, გინდა მეიდანზე იაქტიუროს, გინდა შალახო იცეკვოს... სააკაშვილის ეპოქა დამთავრა.

მამუკა ღლონტი:

- პოლიტიკოსი, საერთოდ, ისტორიით უნდა ინტერესდებოდეს და თუ პოროშენკო დაინტერესდება სააკაშვილის ისტორიით, ალბათ, ამ შეცდომას არ დაუშვებს, რადგან როგორც მინიმუმ, კრახით დამთავრდა სააკაშვილის მმართველობა საქართველოში...

მე არ გამოვრიცხავ, რომ სააკაშვილს კონკრეტული ბიზნესინტერესები ჰქონდეს უკრაინაში, ანუ წარსულში რაიმე ჰქონდეს დაბანდებული და ახლა თავის კაპიტალს იცავდეს და იმიტომ ცდილობს, რომ უკრაინასთან ასეთი კავშირი ჰქონდეს...

მიხეილ სააკაშვილის პოროშენკოს მრჩევლად დანიშვნა ნაკლებად რეალურად მიაჩნია ექსპერტ სოსო ცინცაძეს. მისი აზრით, სააკაშვილის ფაქტორი პოროშენკოსთვის, რომლის ერთ-ერთი მთავარი ამოცანა რუსეთთან ურთიერთობების რეგულაციაა, მხოლოდ პრობლემად შეიძლება გახდეს. სამაგიეროდ ცინცაძე არ გამორიცხავს, რომ მიხეილ სააკაშვილი  კიევის მერის არჩევნებში გამარჯვებული ვიტალი კლიჩკოს უახლოეს გარემოცვაში ვიხილოთ, მათ შორის ვიცე-მერის სახით.

სოსო ცინცაძე:

- არა მგონია პოროშენკომ ეს შეთავაზება მიიღოს სააკაშვილისგან, იმიტომ რომ, პოროშენკოს ერთ-ერთი მთავარი ამოცანა იქნება ურთიერთობების მოწესრიგება რუსეთთან და სააკაშვილის გვარის გაგონებაც კი კრემლში, როგორც წითელი ნაჭერი ხარზე, ისე მოქმედებს პუტინსა და მის გარემოცვაზე... და პოროშენკო ერთადერთი უკრაინელი პოლიტიკური ლიდერია, რომელსაც ერთნაირად ხელეწიფება ურთიერთობები აწარმოოს როგორც რუსეთთან, ასევე ბრიუსელთან და ვაშინგტონთან; პოროშენკო უკრაინელი ნინო ბურჯანაძეა, რადგან ქართულ რეალობაში ბურჯანაძეს შეუძლია აწარმოოს იგივე საგარეო ურთიერთობები. ის არის ნინო ბურჯანაძე უკრაინაში... სააკაშვილი, ალბათ, უფრო კომფორტულად იგრძნობს თავს კლიჩკოს გარემოცვაში.

რაც შეეხება კითხვას, შეუქმნის თუ არა სააკაშვილის პოროშენკოს მრჩევლად დანიშვნა უხერხულობას საქართველოსა და უკრაინის ახალ ხელისუფლებებს ურთიერთობებში, რა თქმა უნდა, შექმნის. რაც არ უნდა ჩვენმა პოლიტკოსებმა სირაქლემის პოზიცია დაიკავონ, რაც მათთვის ბოლო პერიოდში დამახასიათებელი გახდა, უხერხულობა შეიქმნება... სააკაშვილი თავიდანვე აქტიურად ჩაერთო მაედანის ეპოპეაში. აქ კი ამბობდნენ, რას დადის, საქმე არ აქვსო? მაგრამ პოლიტიკაში მთავარი შედეგია. სააკაშვილი დღეს მიიღებს იმ დივიდენდს, რომელიც მან მაედანზე საქმიანობით ნამდვილად დაიმსახურა და

დღევანდელი ჩვენი ხელისუფლებისთვის რასაკვირველია, საჩუქარი სულაც არ იქნება სააკაშვილი, როგორც კლიჩკოს მრჩეველი, ან ვიცე-მერი, ვინაიდან ვიცე-მერს ნიშნავს მერი...

მიხეილ სააკაშვილისა და კახა ბენდუქიძის პეტრე პოროშენკოს მრჩევლად დანიშვნას პოზიტიურად უყურებს თავისუფლებისა და დემოკრატიის განვითარების ინსტიტუტის" აღმასრულებელი დირექტორი თეა თუთბერიძე. თუთბერიძე იმედოვნებს, რომ უკრაინელი ხალხი მეტად გაიზიარებს საქართველოს ექს-პრეზიდენტისა და ექს-მინისტრის გამოცდილებას და მეტად ეფექტურად გამოიყენებს მათ, როგორც რეფორმატორებს.

თეა თუთბერიძე:

მე იმედი მაქვს, რომ დაეხმარება უკრაინას საქართველოს ყოფილი პრეზიდენტისა და ყოფილი მინისტრის რეფორმატორული გამოცდილება, რომელიც ჩვენთან შემდეგ ვეღარ გაგრძელდა, იმ ვითარებიდან გამომდინარე, რომელიც ქვეყანაში შეიქმნა...მოგეხსენებათ, რომ ყველა რეფორმა არის მტკივნეული და საზოგადოებისთვის არ აღმოჩნდა ყველა რეფორმა მისაღები. მე იმედი მაქვს, რომ უკრაინელი ხალხი შეძლებს მთელი ამ გამოცდილების გადატანას და გაზიარებას...

ასევე დაგაინტერესებთ:

რა პოსტებს დაიკავებენ სააკაშვილი და ბენდუქიძე უკრაინის ახალ მთავრობაში

გიორგი გიორგაშვილი, Ambebi.ge