ვინ შეიწირა მალაიზიური ავიალაინერი და მის ბორტზე მყოფი 295 ადამიანი
უკრაინაში უკვე რამდენიმე თვის განმავლობაში მიმდინარე შეიარაღებულ დაპირისპირებას სამოქალაქო ავიალაინერი და მისი მგზავრები შეეწირნენ. 17 ივლისს, დონეცკის ოლქში, რუსეთის საზღვრიდან 50 კმ-ში, ავიაკომპანია Malaysia Airlines–ის კუთვნილი Boeing 777-200ER ჩამოაგდეს (სარეგისტრაციო ნომერი 9M-MRD). თვითმფრინავი ამსტერდამიდან კუალა-ლუმპურში მიფრინავდა. ავიალაინერის ბორტზე 280 მგზავრი და ეკიპაჟის 15 წევრი იმყოფებოდა. ყველა მათგანი დაიღუპა. ინცინდენტი თბილისის დროით 17:20-ზე მოხდა.
თვითმფრინავის ჩამოვარდნისთანავე გაჩნდა ვერსია მისი მეამბოხეების მიერ ჩამოგდების თაობაზე. გამოითქვა ვარაუდები, რომ 10,600 მეტრის სიმაღლეზე მფრენი ლაინერი Бук-ის ტიპის საზენიტო კომპლექსით ჩამოაგდეს. ის სამიზნეს 18-20 კილომეტრის სიმაღლეზე "სწვდება" (მოდიფიკაციისთვის Бук-М1 ეს პარამეტრი 22 კილომეტრია). თვითმფრინავის ჩამოგდებიდან რამდენიმე საათში ინტერნეტში გავრცელდა ვიდეო და ფოტომასალა, რომელზეც ლაინერის ჩამოვარდნის რაიონში გადაადგილებადი მეამბოხეთა კოლონა და მის შემადგენლობაში "ბუკის" თვითმავალი გამშვები დანადგარია ასახული.
აღნიშნული კომპლექსი სსრკ-ში შეიქმნა და შეიარაღებაში ის 1979 წელს მიიღეს. მის შემადგენლობაში საკომანდო პუნქტი, სამიზნის აღმოჩენისა და მითითების სადგური, თვითმავალი გამშვები დანადგარი და გამშვებ-დამტენი დანადგარი შედიან. ყოველი მათგანი ინდივიდუალურ შასიზე მდებარეობს. საჰაერო სამიზნის დაფიქსირებას, აღმოჩენისა და მითითების სადგური ახდენს და ინფორმაციას საკომანდო პუნქტს გადასცემს. ეს უკანასკნელი მიღებულ ინფორმაციას აანალიზებს და გამშვები დანადგარის ეკიპაჟს ტელეკოდური კავშირით უგზავნის. მას თავისი – სამიზნის დასხივების რადარი აქვს.
მოწოდებული ინფორმაციის საფუძველზე ის სამიზნისკენ ტრიალდება და მის დასხივებას იწყებს. გაშვების შემდეგ რაკეტა სწორედ სამიზნიდან არეკლილ დასხივების "სხივს" მიჰყვება. შესაბამისად, მხოლოდ გამშვები დანადგარით, 10,6 კმ-ზე მფრენი სამიზნის აღმოჩენა და მისი ჩამოგდება შუეძლებელია. გავრცელებულ კადრებში კი მხოლოდ ის ფიქსირდება.
განსაკუთრებულ ინტერესს მეამბოხეთა ხელში მოხვედრილი "ბუკის" წარმომავლობა იწვევს. 29 ივლისს, გავრცელდა ცნობა, რომ მეამბოხეებმა დონეცკის ოლქში დისლოცირებული საზენიტო პოლკი (სამხედრო ნაწილი А-1402) დაიკავეს. ის სწორედ "ბუკებით" იყო შეიარაღებული. შემდგომ ეს ინფორმაცია ხელისუფლებამაც დაადასტურა და დაამატა, რომ ყველა გამართული და ბრძოლისუნარიანი საზენიტო საშუალება, სამხედრო ნაწილიდან გამოყვანილი ჰყავდა. მიუხედავად ამისა, ინტერნეტში გავრცელდა ფოტოები, სადაც ამბოხებულები "ბუკის" გამშვები დანადგარის ფონზე პოზირებენ.
ბევრ კითხვაზე პასუხს თვითმფრინავის ფრაგმენტების შესწავლა გასცემს, მაგრამ ეს არც ისე მარტივი პროცედურა იქნება. მალაიზიური ავიალაინერის ფრაგმენტები 15 კილომეტრზეა გაფანტული.
მოამზადა ნუკრი მგელაძემ
ახალი კადრები ბოინგ 777-ის ჩამოგდების ადგილიდან
9 წლის გოგონებს ერთი საათით "ათხოვებენ" - ჟურნალისტებმა ერაყში შემზარავი მასალა გადაიღეს
მოსკოვში ხანძარს 4 ბავშვი ემსხვერპლა - "უყურადღებოდ იყვნენ დარჩენილი, რადგან დედა ან მეზობელთან იყო გასული, ან ნასვამს ეძინა"
