უკრაინის პრეზიდენტის პირველი კომენტარი მალაიზიური თვითმფრინავის კატასტროფის შემდეგ

უკრაინის პრეზიდენტმა პეტრო პოროშენკომ მალაიზიური თვითმფრინავის ჩამოგდებას ტერორისტული აქტი უწოდა. ამის შესახებ ჟურნალისტებს უკრაინის პრეზიდენტის პრესმდივანმა სვიატოსლავ ცეგოლკომ განუცხადა.

"ეს არ იყო ინციდენტი, არც კატასტროფა, არამედ იყო ტერორისტული აქტი"- დაწერა უკრაინის პრეზიდენტმა ტვიტერზე.

მომხდართან დაკავშირებით უკრაინის პრეზიდენტი ტელეფონით ესაუბრა ნიდერლანდების პრემიერ-მინისტრ მარკ რიუტეს, რომელსაც მომხდარის შესახებ ინფორმაცია მიაწოდა. პოროშენკოს განმარტებით, მომხდარი ფაქტი უკანასკნელ დღეებში მესამე შემთხვევაა, მანამდე რუსეთის ტერიტორიიდან ჩამოგდებულ იქნა ან-26 ტიპისა და უკრაინის შეიარაღებული ძალების სუ-25-ის ტიპის თვითმფრინავი.

პოროშენკოს ინფორმაციით, მისი დავალებით შექმნილია სახელმწიფო კომისია, რომელიც ამ ინციდენტის გამოძიებაზე იმუშავებს. მისივე თქმით, გამოძიებაში მონაწილეობის მისაღებად მოიწვია ნიდერლანდებისა და ICAO -ს საერთაშორისო სამოქალაქო ავიაციის სპეციალისტები.

უკრაინული მედიის ინფორმაციით, ნიდერლანდების პრემიერ-მინისტრმა მზადყოფნა გამოთქვა გამოძიებაში ნიდერლანდელი სპეციალისტები ჩაერთონ.

დონეცკის ოლქის დასახლებულ პუნქტ გრაბოვოში გუშინ საღამოს მალაიზიის ავიახაზების კუთვნილი "ბოინგ 777" ჩამოვარდა, რომლის ბორტზე მყოფი 280-ვე მგზავრი და ეკიპაჟის 15-ვე წევრი დაიღუპა. ავიალაინერი ამსტერდამი-კუალა-ლუმპურის რეისს ასრულებდა და 10 ათასი მეტრის სიმაღლეზე მიფრინავდა.

დეტალები ფაქტის შესახებ:

-უკრაინაში ჩამოვარდნილი თვითმფრინავის ყველა მგზავრი დაიღუპა

-პირველი ფოტოები დონეცკში ბოინგის ჩამოვარდნის ადგილიდან

ვიდეო:

-შემზარავი კადრები: დამსხვრეული მალაიზიური ”ბოინგი” და დაღუპული მგზავრები (+18)

-გავრცელდა "ბოევიკების" აუდიოჩანაწერი, სადაც ისინი სამოქალაქო თვითმფრინავის ჩამოგდებაზე საუბრობენ