6
ივნისიდღის ზოგადი ასტროლოგიური პროგნოზი
1980-იანი წლების ბოლოს იტალიის პოლიციამ ოფიციალურად დაადასტურა, რომ "ფლორენციელი მონსტრი" მართლაც პიეტრო პაჩიანია, თუმცა, მკვლელის მოულოდნელმა გარდაცვალებამ ხელი შეუშალა გამოძიების დასრულებას და სწორედ ეს იქცა ჟურნალისტებისთვის მთავარ მიზეზად მუდმივად დაუბრუნდნენ "ფლორენციელი მონსტრის" საქმეს, გამოთქვან საკუთარი ეჭვები და ხშირად დაუჯერებელი ვერსიები...
სერიული მკვლელის პირველი გამოჩენა
"ფლორენციელ მონსტრად" წოდებული მკვლელი პირველად 1981 წელს გამოჩნდა, როცა ივნისის დასაწყისში ფლორენციის შემოგარენში 30 წლის ჯოვანი ფოჯი და 21 წლის კარმელა დი ნუჩი იპოვეს მოკლული. მამაკაცი საჭესთან იჯდა ნატყვიარით თავში, გოგონა კი, მანქანასთან ახლოს, სასიკვდილო ჭრილობით გულმკერდის არეში.
მკვლელობა სოფლის ტერიტორიაზე მოხდა, ცხედრები ადგილობრივებმა აღმოაჩინეს, რომლებიც ერთიანად მიაწყდნენ შემთხვევის ადგილს, უნებლიედ გაანადგურეს დანაშაულის კვალი და კრიმინალისტებსაც ხელი შეუშალეს საჭირო სამხილების ამოღებაში. პოლიციამ მხოლოდ იმის დადგენა შეძლო, რომ მკვლელობის საღამოს ჯოვანი და კარმელა ჯერ ადგილობრივ დისკოთეკას სტუმრობდნენ, მერე კი, განმარტოება გადაწყვიტეს, თავშესაფრად დასახლებული პუნქტისგან მოშორებით, მყუდრო ადგილი აირჩიეს და წარმოდგენაც არ ჰქონდათ, რომ იქვე ახლოს მკვლელი იყო ჩასაფრებული.
ორმაგი მკვლელობა ძალიან ჰგავდა შვიდი წლით ადრე მომხდარ დანაშაულს, როცა ფლორენციიდან ჩრდილოეთით, ისევ სოფლის ტერიტორიაზე იპოვეს ორი ახალგაზრდის ცხედარი. მამაკაცი თავში გასროლით იყო მოკლული, გოგონას კი, ისევ გულმკერდის არეში ჰქონდა მიყენებული სასიკვდილო ჭრილობა. მკვლელობა გაუხსნელი დარჩა, რადგან პოლიცია ჯიუტად ეძებდა მოტივს, ფსიქიურად აშლილ მოძალადეს კი, ჩანაფიქრის განსახორციელებლად არასდროს სჭირდება მოტივი და მხოლოდ კარმელასა და ჯოვანის ცხედრების აღმოჩენის შემდეგ გახდა ნათელი, რომ ფლორენციაში სერიული მკვლელი გამოჩნდა, რომელსაც პრესამ სწრაფად უწოდა "ფლორენციელი მონსტრი".
იხილეთ მეტი "პალიტრანიუსის" გადაცემაში "არაჩვეულებრივი ისტორიები"
პოლიციის სატყუარა
პოლიციამ სწრაფად მიაგნო ეჭვმიტანილს, რომელიც ადგილობრივებისთვის კარგად ნაცნობი ენცო სალვატორე აღმოჩნდა. ფსიქიურად გაუწონასწორებელი სალვატორე ხშირად უთვალთვალებდა შეყვარებულებს და პოლიციამაც ჩათვალა, რომ სწორედ მან მოკლა წყვილი კვალის დასაფარად, როცა თვალთვალში გამოიჭირეს. სალვატორეს დაკითხვა რამდენიმე დღეს გაგრძელდა, სამართალდამცავები დიდხანს ეძებდნენ მისი დანაშაულის დამადასტურებელ სამხილებს,თუმცა ბოლოს მიხვდნენ, რომ ფსიქიურად დაავადებულ ენცოს მათ გარეშეც საკმაოდ ჰქონდა პრობლემები, საზარელ მკვლელობებთან კი, არაფერი აკავშირებდა...
"ფლორენციელი მონსტრის" ცრუ კვალი
სამართალდამცავებს იმედი ჰქონდათ, რომ პანიკაში ჩავარდნილი მკვლელი შეცდომას დაუშვებდა და გათვლამ ნაწილობრივ გაამართლა... მკვლელი, როგორც ჩანს, დაფრთხა და გამოძიების ცრუ კვალზე დაყენება გადაწყვიტა. ერთი შეხედვით ახალი მკვლელობა არაფრით ჰგავდა უკვე ჩადენილს, რადგან ამჯერად მკვლელმა არა შეყვარებული წყვილი, არამედ ორი მამაკაცი გამოასალმა სიცოცხლეს. თუმცა, ექსპერტიზამ დაამტკიცა, რომ ტურისტებიც იმავე იარაღით მოკლეს, რომლითაც ყველა დანარჩენი. გარდა ამისა, ერთ-ერთ დაღუპულს გრძელი ქერა თმა ჰქონდა და შესაძლოა, ღამის წყვდიადში მკვლელმა ვერ გაარჩია ერთმანეთისგან ქალი და მამაკაცი, მერე კი, საკუთარ შეცდომას მიხვდა და სწრაფად დატოვა შემთხვევის ადგილი.
"ფლორენციელი მონსტრი" თავისუფალია
ფრანგი ტურისტების მკვლელობის შემდეგ "ფლორენციელი მონსტრის" საქმე იტალიის პოლიციის მთავარმა სამმართველომ გადაიბარა და სპეციალური საგამოძიებო ჯგუფი შექმნა, რომელშიც შეერთებულ შტატებში, გამოძიების ფედერალური ბიუროში გამოცდილებაშეძენილი რამდენიმე სამართალდამცავი გაერთიანდა და სწორედ მათ შეძლეს ეჭვმიტანილის დაკავება.
ჯერ ძალადობრივი დანაშაულისთვის ნასამართლევი ფლორენციელები შეამოწმეს, მერე კი, მათი გადაადგილების რუქა შეადგინეს, მკვლელობების დროს, ადგილს შეადარეს და პიეტრო პაჩიანისაც მიაგნეს, რომელსაც არც ალიბი ჰქონდა და მკვლელობის დროსაც თავისუფლად შეეძლო ყოფილიყო დანაშაულის ადგილას. მით უმეტეს, რომ მანამდეც ნასამართლევი იყო ეჭვიანობით ჩადენილი მკვლელობისთვის.
პაჩიანი 1951 წელს გაასამართლეს და 13-წლიანი პატიმრობაც მიუსაჯეს საცოლის საყვარლის მკვლელობისთვის. პაჩიანიმ სასამართლოზე აღიარა, რომ მოღალატე საცოლის დანახვაზე გონება დაებინდა და დაუფიქრებლად ესროლა მის კავალერს თოფიდან. სწორედ ამ აღიარებამ მიიქცია იტალიელი პოლიციელების ყურადღება, რომელთა აზრით ფსიქოპატი პაჩიანი აბსოლუტურად ერგებოდა მანიაკის იმ სტანდარტულ დახასიათებას, რომელსაც ჩვეულებრივ იყენებდნენ შეერთებულ შტატებში.
პაჩიანი დააპატიმრეს, 11-დღიანი ჩხრეკა მის სახლში 22-კალიბრიანი პისტოლეტის ვაზნის და ორი ტყავის პლანშეტის ამოღებით დასრულდა. ვაზნა აბსოლუტურად ერგებოდა მკვლელობის იარაღს, პლანშეტები კი, გერმანიის იმ ქალაქში იყო შეძენილი, საიდანაც ტურისტები ჩამოვიდნენ. გარდა ამისა, პაჩიანის მკვლელობის არცერთ დღეს არ ჰქონდა ალიბი.
დაპატიმრების ორდერის მიიღების შემდეგ, პოლიციამ გარდაცვლილი პაჩიანი იპოვა საკუთარ სახლში, რომელიც ექსპერტიზის დასკვნით ბუნებრივი სიკვდილით გარდაიცვალა და ამგვარად "თავი აარიდა" განმეორებით სასამართლო პროცესს...
1980-იანი წლების ბოლოს "ფლორენციელი მონსტრის" საქმე დაიხურა, მაგრამ სულ რამდენიმე წლის წინ იტალიურმა პრესამ ახალი სენსაციური ინფორმაცია გამოაქვეყნა - ჟურნალისტები ამტკიცებდნენ, რომ პოლიციამ ეზოთერული სექტის წევრი, ვინმე ფრანჩესკო კალამანდრეი დააკავა, რომელმაც აღიარა 1980-იან წლებში რამდენიმე რიტუალური მკვლელობის ჩადენა და შეყვარებული წყვილების სიკვდილიც საკუთარ თავზე აიღო. თუმცა, იტალიის პოლიციამ კალამანდრეის აღიარება არ მიიღო, "ფლორენციელ მონსტრად" ისევ პიეტრო პაჩიანი მიიჩნია და ჟურნალისტებსაც იგივე ურჩია, თუმცა, პრესის წარმომადგენლები მაინც ვერ ივიწყებენ გასული საუკუნის ყველაზე გახმაურებული მკვლელობების სერიას და ბევრი დღემდე აგრძელებს საკუთარ გამოძიებას...
