გვანცა დარასელია ბიჭის დედა გახდა

"რუსთავი 2"-ის დილის გადაცემის წამყვანი გვანცა დარასელია უკვე რამდენიმე კვირაა ეთერში აღარ ჩანს. ამისთვის მას საპატიო მიზეზი აქვს. 18 იანვარს გვანცა დედა გახდა. ბუკლე ამ სიახლის გაგებისთანავე გვანცას დაუკავშირდა.

- გვანცა, გილოცავ დედობას.

- ძალიან დიდი მადლობა.

- როგორც ვიცი, ბიჭის დედა გახდი. პატარას რა დაარქვით?

- ერეკლე. ეს სახელი მეც და ჩემს მეუღლეს, ვახტანგ მჭედლიძეს ძალიან მოგვწონს.

- მეუღლე დაესწრო მშობიარობას?

- არა, გარეთ ნერვიულობდა.

- გაგიჭირდა მშობიარობა?

- მშობიარობის პროცესი მთელი დღე გაგრძელდა და რასაკვირველია, რთული იყო. საბედნიეროდ, ყველაფერი კარგად დამთავრდა.

- პირველი მშობიარობის შემდეგ ქალები ამბობენ ხოლმე, მეორე ბავშვს აღარ გავაჩენთო. სამშობიაროდან წამოსვლის შემდეგ შენც იგივე რამ ხომ არ თქვი?

- მე ვამბობ, ორსულობა და მშობიარობა ცოტა ხანს აღარ მინდა-მეთქი. მეორე ბავშვს მოგვიანებით, რამდენიმე წლის მერე აუცილებლად გავაჩენ.

- დედობამ შეგცვალა?

- ყველა, მათ შორის ჩემი მეუღლეც მეუბნება, რომ ძალიან შევიცვალე. უფრო მშვიდი და წყნარი გახდიო, ამბობენ, თუმცა მე ჩემს თავს ცვლილებას ვერ ვამჩნევ.

- ბავშვის გაზრდაში გეხმარება ვინმე, თუ მარტო უმკლავდები ყველაფერს?

- ყველა მეხმარება. ერეკლეს მოვლაში ჩემი და ჩემი მეუღლის ოჯახის წევრები აქტიურად არიან ჩართული.

- სამსახურში როდის დაბრუნდები?

- სამი თვე დეკრეტული შვებულება მაქვს აღებული. ამ დროის გასვლის შემდეგ ეთერში აუცილებლად დავბრუნდები.

ჟურნალი "რეიტინგი"

(გამოდის ორშაბათობით)