24
ივლისიდღის ზოგადი ასტროლოგიური პროგნოზი
"შუა დღის" მომხიბვლელი წამყვანი, პრეზიდენტის რძალი ლიკა ევგენიძე კარიერასა და დედობას ერთმანეთს არაჩვეულებრივად უთავსებს. მისი და ნიკა ალასანიას ახალგაზრდა ოჯახს მცირეწლოვანი ანა-სოფია დიდ ხალისს მატებს. როგორც თავად ლიკამ აღნიშნა, - პატარა მშობლებს ჰგავს და ძალიან ხალისიანია. ლიკასთან ინტერვიუს ჩაწერას დიდი ხნის წინ ვგეგმავდი, მაგრამ იგი ამერიკაში გაემგზავრა, სადაც მისი მეუღლის, ნიკა ალასანიას მშობლები ცხოვრობენ. სექტემბერში გადაცემის ახალი სეზონი დაიწყო და სატელევიზიო საქმიანობაში ლიკაც აქტიურად ჩაება.
- როგორც ვიცი, ამერიკაში იყავი. როგორ დაისვენე?
- "მწვანე ბარათი" მაქვს და პერიოდულად, ამერიკაში უნდა ჩავიდე. ნიკას მშობლები იქ ცხოვრობენ და სამსახურის გამო საქართველოში ჩამოსვლას ვერ ახერხებენ. ბავშვიც დიდი ხანია, ნანახი არ ჰყავდათ და ამიტომაც გადავწყვიტე, ამ ზაფხულს ნიუ-იორკში წავსულიყავი. ამერიკიდან ჩამოსვლის შემდეგ ცოტა ხნით ბათუმს ვეწვიე. მოკლედ, ეს ზაფხული მართლაც, ფანტასტიკურად გავატარე.
- ამერიკაში აქტიური დასვენება გამოგივიდა?
- კი, საკმაოდ აქტიურად დავისვენე. ამერიკაში თავს უცხოდ ვერ იგრძნობ, თან იქ ყველა სხვადასხვა აქცენტით ლაპარაკობს. ხშირად აღნიშნავენ, - ნიუ-იორკში მყოფს სადმე თუ არ გეჩქარება, ე.ი. ტურისტი ხარო, მაგრამ ამ ქალაქმა მეც თავის ჭკუაზე გადამიყვანა, სულ სადღაც მეჩქარებოდა. ძალიან ბევრი კულტურული ღონისძიება ტარდება, არის საინტერესო გამოფენები, კონცერტები და მეც ვცდილობდი, ყველაფერი მენახა. ჰოდა, რა გასაკვირია, რომ ძალიან ნასიამოვნები ჩამოვედი. მართალია, ნიუ-იორკში ძალიან ბევრი რამ ვნახე, მაგრამ ბევრიც დამრჩა სანახავი. იმედია, ცნობისმოყვარეობას მომავალ წელს დავიკმაყოფილებ.
- დედის ამპლუაში თავს როგორ გრძნობ?
- არაჩვეულებრივად! დედობა ძალიან საინტერესო რამაა და მერწმუნეთ, რაც დრო გადის, მით უფრო საინტერესო ხდება. ანა-სოფია უკვე წლისა და 4 თვისაა ანუ ახლა იწყებს ლაპარაკს, სიტყვების თქმას ცდილობს; ახალდაბადებული ცხადია, უსუსური იყო, ვერ მაგებინებდა, რა სურდა, ახლა კი კონტაქტში შემოდის, სასაცილო რაღაცებს აკეთებს, ბევრი რამ აოცებს, უჩნდება კითხვები, ემოციებს გამოხატავს - ეს ყველაფერი კი ძალზე საინტერესოა.
- ბავშვის აღზრდაში ნიკა თუ გეხმარება?
- რა თქმა უნდა! მიმაჩნია, რომ შვილის აღზრდაში დედაც და მამაც აქტიურად უნდა მონაწილეობდნენ, პატარას ჯანსაღი ფსიქიკა რომ ჩამოუყალიბდეს. როცა ანა-სოფია პატარა იყო, ნიკა მის მოვლაშიც ძალიან მეხმარებოდა - ღამით დგებოდა, ბავშვს უცვლიდა. სხვათა შორის, ამ მხრივ ახლაც აქტიურობს, ეს პროცესი დიდ სიამოვნებას ანიჭებს. ბავშვი დილით 7-8 საათზე იღვიძებს, მე კი ათის ნახევარზე ვდგები. სანამ ძიძა მოვა, ნიკა ახალგაღვიძებულ ბავშვს გადმოიწვენს, ეთამაშება, თან ცდილობენ, არ გამაღვიძონ. მოკლედ, ერთი რაღაცას მღერის, მეორე სიცილით იფხრიწება, პატარა ძალიან სასაცილო რაღაცებს აკეთებს და ბოლოს, ისევ მეუღლის სიცილი მაღვიძებს... ხანდახან ანა-სოფია მოვა და თმაზე მომქაჩავს, ამაზე კი ნიკა კარგად ერთობა... მოკლედ, ყოველი დილა მხიარულად იწყება.
- ანა-სოფია მტირალა ხომ არ არის?
- სხვათა შორის, ყოველთვის უპრობლემო ბავშვი იყო. ღამით იშვიათად იღვიძებდა, სხვების მსგავსად არ ტიროდა და არც მუცელი აწუხებდა. ისე, ტირილი არც გამოსდის: როცა უნდა, რომ იტიროს, წუწუნს იწყებს, მაგრამ მალევე ჩერდება და სიცილზე გადადის (იღიმის).
- ანა-სოფია ხასიათით ვის ჰგავს?
- არც მე და არც ნიკა უხასიათოები არ ვართ ანუ ბავშვი ჩვენ გვგავს.
- სამსახური, დედობა, მეუღლეობა - რამდენად იოლია ამ ყველაფრის ერთმანეთთან შეთავსება?
- ჩემთვის ყველაზე რთული უსაქმურობაა. ზაფხულის ბოლოს უკვე ვწუწუნებდი: დავიღალე, აღარ მინდა დასვენება-მეთქი. ვცდილობ, საქმეები ერთმანეთს შევუთავსო. ისე კი, ძალიან დატვირთული დღის რეჟიმიც არ მაქვს: სამსახურში 3 საათამდე ვარ, მერე შინ მივდივარ და მთელ დროს ოჯახს ვუთმობ. მე და ჩემს მეუღლეს გვიყვარს ერთმანეთი და ვცხოვრობთ იმისათვის, რომ ერთურთი გავაბედნიეროთ. ვცდილობთ, მეტი სითბო გავცეთ და მერწმუნეთ, რაც მეტს გავცემთ, მით მეტი გვიბრუნდება უკან. და კიდევ, საღამოობით ვახშმის კეთებასაც ვახერხებ.
- კერძების მომზადება გეხერხება?
- ხშირად მეკითხებიან, - შენ სამზარეულოში ტრიალებო?! სიმართლე გითხრათ, ვერ ვხვდები, ეს რატომ უკვირთ. რა, ხელები არ მაქვს? კერძების მომზადება ჩემი ჰობია, ნამცხვრებსა და ტორტებსაც ვაცხობ ხოლმე... ჩემ მიერ მომზადებული საჭმელი ნიკას ძალიან მოსწონს და სხვათა შორის, ისიც არაჩვეულებრივი მზარეულია, ერთმანეთს ახალ-ახალი კერძებით ვანებივრებთ.
- მეორე ბავშვის გაჩენას ხომ არ გეგმავ?
- აუცილებლად! გვინდა, 4 შვილი მაინც გვყავდეს, რადგან ვიცით, დედმამიშვილებზე ძვირფასი არავინაა. პირადად მე, 3 და და 2 ძმა მყავს, ნიკას კი მხოლოდ ძმა ჰყავს და ხშირად აღნიშნავს, - კარგი იქნებოდა, დაც რომ მყოლოდაო... ალბათ, მალე მეორე ბავშვსაც გავაჩენ.
- ტელევიზიაში მუშაობაც შენი ჰობია?
- რა თქმა უნდა, არა! სუბიექტურობაში ნუ ჩამითვლით და როცა ჩვენს გადაცემას მაყურებლის თვალით ვუყურებ, ვფიქრობ, რომ საკმაოდ საინტერესოა. მას შემდეგ, რაც ამ გადაცემაზე დავიწყე მუშაობა, ძალიან ბევრი საინტერესო ამბავი მოვისმინე, ბევრი ადამიანი გავიცანი. მოკლედ, "შუა დღემ" ბევრი რამ მასწავლა.
- საკმაოდ სახალისო გადაცემა გამოგივიდათ. ალბათ თავადაც კარგად ერთობით...
- ვცდილობთ, მაყურებელს მსუბუქად და სასიამოვნოდ მივაწოდოთ ნებისმიერი სახის ინფორმაცია და ეკრანს მიღმა ჩვენც ძალიან კარგად ვერთობით. ამას წინათ დუტა გვერდით პავილიონში წერდა გადაცემას. რომ დაუნახავს, ეთერში ვიყავით, პავილიონში ცეკვა-ცეკვით შემოგვივარდა, რაც წამყვანებისთვისაც მოულოდნელობა იყო. მოკლედ, დუტას ხომ ვერაფერს გამოაპარებ, ყველგან უნდა იყოს (იღიმის)... რაც მთავარია, ეკრანზე არავინ ვთამაშობთ.
- ახალი სეზონი უკვე დაიწყო. მაყურებელს რამე სიურპრიზს ხომ არ უმზადებთ?
- ეს ამბავი შენ რომ გაგიმხილო, მერე სიურპრიზიც აღარ გამოგვივა, ამიტომ მოდი, ყველაფერს საიდუმლოდ დავტოვებ. ისე კი, მერწმუნე, მაყურებელს ძალიან ბევრ სიახლეს ვპირდებით.
ელენე ბასილიძე
ჟურნალი "გზა"
(გამოდის ხუთშაბათობით)
