დაგ ჰატჩინსონი და კორტნი სტოდენი - ყველაზე არასტანდარტული ჰოლივუდური წყვილი

შობის წინ ამ უცნაურმა წყვილმა კვლავ შეახსენა თავი საზოგადოებას - სადღესასწაულო განწყობის ასამაღლებლად, სექსუალური ფიფქიას როლში შესულმა მომღერალმა და სანტას სამოსში გამოწყობილმა მისმა მსახიობმა ქმარმა ვნებიან ფოტოსესიაში მიიღეს მონაწილეობა.

51 წლის მსახიობის, "დაკარგულებისა" და "მწვანე მილის" ვარსკვლავის დაგ ჰატჩინსონის ცოლი კორტნი სტოდენი მხოლოდ 17 წლის არის, თუმცა მრავალრიცხოვანი პლასტიკური ოპერაციების წყალობით ლამის თავის ქმარზე უფროსად გამოიყურება.

საშობაო ფოტოსესიის განმავლობაში მომღერალი და მსახიობი, რომელთაც გასული წლის ივლისში იქორწინეს, ცდილობდნენ დაემტკიცებინათ, რომ მათ ურთიერთობებში ყოველთვის ზაფხულია.

სტოდენი აღიარებს, რომ დაგთან თავს ბედნიერად გრძნობს და მათი ერთობლივი ცხოვრება ნამდვილი ზეიმია. "ლოგინიდან როგორც კი ვდგები, სტრიპტიზიორივით გამოვეწყობი ხოლმე და ისე დავდივარ. დაგსაც მოსწონს ჩემი "თამაშები", - ამბობს გოგონა.

მსახიობისთვის ეს მესამე ქორწინებაა, თუმცა შვილი ჯერ არ ჰყავს. რაც შეეხება სტოდენს, ბავშვობიდან მიიწევდა შოუბიზნესისკენ. 12 წლისამ დაიწყო მოდელობა, სამოდელო სააგენტოსთან გააფორმა კონტრაქტი, 15 წლისამ სილამაზის კონკურსში გაიმარჯვა მშობლიურ ქალაქში და "მის ოუშენ შორსი" გახდა. მერე იყო კონკურსი "მის ვაშინგტონი". თავის ქალაქში ნამდვილი ვარსკვლავი იყო, ტელეშოუც კი მიჰყავდა. რაც მეტ პოპულარობას აღწევდა, მით მეტად ეზრდებოდა ამბიცია და პლასტიკური ოპერაციები ერთმანეთის მიყოლებით გაიკეთა, რის შედეგადაც საბოლოოდ ეს სახე მიიღო. თუმცა ასეთი სექსუალური გარეგნობის გამო სკოლაში ვეღარ დადიოდა, სკოლა მიატოვა და შინ აგრძელებდა სწავლას.

მოგვიანებით კორტნიმ რამდენიმე ფილმშიც მიიღო მონაწილეობა და სწორედ ასე შეხვდა 51 წლის დაგლას ჰატჩინსონს, რომელსაც მანამდე რამდენიმე მნიშვნელოვანი როლი ჰქონდა შესრულებული ფილმებში "მწვანე მილი", "მე - სემი", "მოკვლის დრო", "დაკარგულები", "24 საათი" და ა.შ.

2011 წელს, როცა დაგმა კორტნი სტოდენთან ურთიერთობების შესახებ განაცხადა, გოგონა ჯერ კიდევ 16 წლის იყო. არასრულწლოვანი მოდელისა და მსახიობის (რომელიც მომღერლის კარიერასაც იწყობს) ურთიერთობა 51 წლის დაგთან განხილვის საგანი გახდა. უკვე მსჯელობდნენ არა დაგის შესრულებულ როლებზე, არამედ მის სკანდალურ ქორწინებაზე. სკანდალური ქორწინებით წყვილმა მოახერხა, მსოფლიოში ერთ-ერთ ყველაზე ცნობილ და საინტერესო წყვილად ქცეულიყო.

თუმცა ისინი ყურადღებას არ აქცევენ საზოგადოების გაკიცხვას და ამტკიცებენ, რომ ძალიან ბედნიერები არიან. უფრო მეტიც, თავიანთი ინტიმური ცხოვრების დეტალებზე მეტი მონდომებით საუბრობენ და წინასაშობაოდ ჩატარებული ფოტოსესიაც ამ "გამოწვევის" დასტური იყო. კორტნის თქმით, დაგი ლოგინში ნამდვილი ვეფხვია, დაგი კი იმით ამაყობს, რომ კორტნისთვის ის პირველი მამაკაცი იყო.

კორტნის კი დაგთან ქორწინებამ მართლაც დიდი დივიდენდები მოუტანა. ჯერ კიდევ მისი საცოლე იყო, რომ ჟურნალისტებს ინტერვიუში ოფიციალურად სთხოვდა მილიონ დოლარს. მას მერე ყველანაირად ცდილობს საზოგადოების ყურადღების მიპყრობას. მაგალითად, ერთხელ "ფეისბუკზე" შევიდა საჩივრები მის გვერდზე მეტისმეტად პორნოგრაფიული ფოტოების შესახებ, რის შემდეგაც კორტნის გვერდი ადმინისტრატორებმა დაბლოკეს. თუმცა კორტნიმ დაიჩივლა, ჟურნალისტებთან საკუთარი უფლებების შელახვაზე ბევრი ისაუბრა და მიაღწია იმას, რომ ინტერნეტგვერდი აღუდგინეს.

სულ ცოტა ხნის წინ კორტნიმ გადაწყვიტა, უარყოს გავრცელებული ხმები მისი პლასტიკური ოპერაციების შესახებ და დაამტკიცოს, რომ ბუნებრივად არის ასეთი დახვეწილი ფორმების. ამერიკულ ტელევიზიაში შოუზე მივიდა და ექიმებს დართო ნება, დაკვირვებით დაეთვალიერებინათ მისი მკერდი და დაედასტურებინათ, რომ ის მართლაც ბუნებრივია.

ექიმმა და მედდამ ღია ეთერში ჩაატარეს მისი სარძევე ჯირკვლების ულტრაბგერითი გამოკვლევა. ხანგრძლივი დაკვირვების შემდეგ ექიმმა დაასკვნა, რომ გოგონას მოცულობითი მკერდი მართლაც ნატურალურია.

არადა, მის სახესა და ტანს აშკარად ეტყობა, რომ ქირურგის სკალპელი არაერთხელ შეხებია. მისი უწინდელი ფოტოები ამის აშკარა დასტურია. სავარაუდოდ, კორტნიმ ამ შოუშიც უამრავი ფული გადაიხადა, რომ ხმები გაეფანტა და საკუთარი "უნიკალურობის" შესახებ საზოგადოება კიდევ ერთხელ აელაპარაკებინა.

რაც მთავარია, მისი ქმარიც აქტიურად არის ჩაბმული ამ კამპანიაში და არ ეზარება, ყოველ მეორე ინტერვიუში ამტკიცოს, რომ მისი ახალგაზრდა ცოლი ბუნებრივად არის ასეთი ლამაზი და სექსუალური.

ჟურნალი "რეიტინგი"

(გამოდის ორშაბათობით)