"ზოგიერთ ქალს გზაზე მეც ვუფრთხი"

ჟურნალისტ ლულუ კახიანს მიაჩნია, რომ ქალისთვის ყველაზე შესაფერისი ავტომობილი ჰყავს. ლულუ ავტომობილზე, მის მართვასა და პატრულთან ურთიერთობაზე გვესაუბრება:

- პირველად საჭესთან ჩემმა ნათლიამ დამსვა, "ფორდ ესკორტი" ჰყავდა და თბილისის ზღვაზე დავყავდი სასწავლებლად. ამის შემდეგ აბასთუმანში წავედი დასასვენებლად, სადაც უფრო მეტად "დავამხეცე" ავტომობილის მართვა.

- რომელი იყო შენი პირველი ავტომობილი?

- "ჰიუნდაი", რომელიც იაფად შევიძინე ნათესავისგან. ამ მანქანისთვის ბანკიდან კრედიტი გამოვიტანე და ორი წლის განმავლობაში ვიხდიდი. ახლა უკვე "პაჯერო იო" მყავს, ორკარიანი, რუსთავის ბაზრობაზე შევიძინე 4 .500 დოლარად.

- რატომ მაინცდამაინც ეს ავტომობილი?

- ქმარმა დაჟინებით მომთხოვა, "პაჯერო" მეყიდა, იმიტომ, რომ გამოცდილი ჰყავს. ამ მარკის ავტომობილით შემოვლილი აქვს მთელი საქართველო... პატარაა, კომფორტული და ქალისთვის დამაკმაყოფილებელი. გარდა ამისა, წვავს ცოტას - სულ 10 ლიტრი უნდა 115 კმ-ზე, ოღონდ კარგი ბენზინი.

- პატრული ხშირად გაჩერებს?

- 6 წელიწადია საჭესთან ვზივარ და ორჯერ დამაჯარიმეს: ერთხელ - დილის 7 საათზე, როცა ტელევიზიაში მეჩქარებოდა და ყაზბეგის ქუჩაზე წითელ შუქნიშანზე გავიარე, მეორედ კი - გადაღებიდან ვბრუნდებოდი, მაშინაც მეჩქარებოდა, პატრულის მანქანა კი ნელა მიიზლაზნებოდა და არ მატარებდა, დავუსიგნალე, ფარებიც ავუნთე, მაგრამ არ დამითმო გზა, ამიტომ ავდექი და გადავკვეთე ორი ხაზი, რის გამოც გამაჩერეს და დამაჯარიმეს.

- რას შეადარებ მანქანას?

- მანქანა ჩემი უერთგულესი მეგობარია.

- ფერს და ნომერს თუ აქვს შენთვის მნიშვნელობა?

- არც ისე დიდი, რომ ამაზე ზედმეტი ფული ვხარჯო.

- ლულუ, ხომ არ ღიზიანდები, როცა მამაკაც მძღოლებს ქალების პროფესიონალიზმში ეჭვი ეპარებათ?

- ზოგ ქალს მეც კი ვუფრთხი გზაზე. ისე, ვინც იცის, როგორ ვატარებ, აღიარებს, რომ პროფესიონალი ვარ.

- იოლად ათხოვებ მანქანას მეგობარს?

- მირჩევნია, მე მოვემსახურო.

- რომელ ავტომობილზე ოცნებობ?

- ავტომობილი ჩემთვის მხოლოდ კომფორტულად გადაადგილების საშუალებაა, თუმცა თუ ვინმე უახლეს მოდელს მაჩუქებს, უარს არ ვეტყვი.

სოფო ყარალაშვილი

ყოველკვირეული გაზეთი ”ყველა სიახლე”

(გამოდის ხუთშაბათობით)