მძიმე ღამის ქრონიკა: ნაგვის ურნებით გადაკეტილი პარლამენტის შესასვლელი, დაძაბულობა იუსტიციის სახლთან და დაშავებული მოქალაქეები - რა ხდებოდა თბილისში?
რუსთაველის გამზირზე საავტომობილო მოძრაობა აღდგა. ამ დროისთვის გამზირზე დასუფთავების სამსახურმა დაიწყო მუშაობა.
ახალგაზრდების ნაწილი, რომლებიც „უცხოური გავლენის გამჭვირვალობის შესახებ“ კანონპროექტს აპროტესტებდნენ, პარლამენტის მიმდებარედ კვლავ რჩება. მანამდე, საპატრულო პოლიციის დეპარტამენტის დირექტორმა, ვაჟა სირაძემ აქციის მონაწილეებს პროტესტის მშვიდ გარემოში, პარლამენტის წინ გაგრძელებისკენ მოუწოდა.
რა ხდებოდა მთელი ღამე დედაქალაქის მთავარ გამზირზე?
პარლამენტთან შეკრებილების დასაშლელად საპოლიციო ძალები ე.წ. წიწაკის სპრეის, ცრემლსადენ გაზსა და ასევე, წყლის ჭავლს პერიოდულად უშვებენ, თუმცა აქციის მონაწილეები ჯერჯერობით საკანონმდებლო ორგანოსთან რჩებოდნენ. ე.წ წიწაკის სპრეისა და ცრემლსადენი გაზის გამოყენების გამო, პირველადი სამედიცინო დახმარების გაწევა ათობით მოქალაქეს დასჭირდა.
ძირითადად, მოქალაქეებს სუნთქვასთან დაკავშირებული პრობლემები აღენიშნებოდათ.
პარლამენტთან შეკრებილების დასაშლელად საპოლიციო ძალები ე.წ. წიწაკის სპრეის, ცრემლსადენ გაზსსა და ასევე, წყლის ჭავლს პერიოდულად უშვებენ, თუმცა აქციის მონაწილეები ჯერჯერობით საკანონმდებლო ორგანოსთან მაინც რჩებოდნენ.
ეტაპობრივად სიტუაცია იძაბებოდა პარლამენტის შენობის გვერდითა შესასვლელთან, ჩიტაძის ქუჩაზე. დაახლოებით 03:00 საათისთვის აქციის მონაწილეებმა საკანონმდებლო ორგანოს გვერდითა შესასვლელთან ნაგვის ურნები მიიტანეს, მათი მისამართით პარლამენტის ეზოდან წყლის ჭავლი კიდევ ერთხელ გაუშვეს.
ამას გარდა, მომიტინგეებმა ნაგვის ურნა მიიტანეს პარლამენტის შენობის უკანა შესასვლელთან.
მანამდე კი ნაგვის ურნები განალაგეს სდსს-ს შესავლელთან, ასევე, დაანთეს ცეცხლი, რომელიც წყლის ჭავლის მანქანით ჩააქრეს. აქციის მონაწილეების მხრიდან ისმოდა სხვადასხვა სახის შეძახილები.
აქციის კიდევ ერთი კერა - სანაპირო
იუსტიციის სახლთან, სადაც „უცხოური გავლენის გამჭვირვალობის შესახებ“ კანონპროექტის მოწინააღმდეგეთა ნაწილს გზის სავალი ნაწილი ჰქონდათ გადაკეტილი, ვითარება რამდენჯერმე დაიძაბა.
ვითარების დაძაბვა გამოიწვია რამდენიმე ავტომობილის მძღოლსა და აქციის მონაწილეებს შორის სიტყვიერმა დაპირისპირებამ.
პროტესტის მონაწილეები ავტომობილის მძღოლებს იუსტიციის სახლის მიმდებარედ განლაგებული ბარიკადების გავლის საშუალებას არ აძლევდნენ. შეკრებილები მხოლოდ სასწრაფო დახმარების ავტომობილებს ატარებდნენ.
- გამთენიისას სიტუაცია დაიძაბა ჭიჭინაძის ქუჩაზე
ჩიტაძის ქუჩაზე მყოფი აქციის მონაწილეები ჭიჭინაძის ქუჩაზე გადავიდნენ. ჭიჭინაძის ქუჩაზე გადანაცვლების გადაწყვეტილება მომიტინგეებმა მას შემდეგ მიიღეს, რაც მათთვის ცნობილი გახდა, რომ პარლამენტის შესასვლელთან ნაგვის ურნებითა და სხვადასხვა ნივთებით მოწყობილი ბარიკადებიდან ერთი პირი პარლამენტის ეზოში გადავარდა.
აქციის მონაწილეები აცხადებდნენ, რომ ის უკან არ დაბრუნებულა, რამაც მათი გაღიზიანება გამოიწვია. მათ აღნიშნულ მხარეს არსებულ შესასვლელთანაც მიიტანეს ნაგვის ურნები და სხვადასხვა ნივთები. აქციის მონაწილეებმა ჩაამსხვრიეს პარლამენტის შენობის ფანჯარაც.
პარლამენტის შენობაში მყოფმა გდდ-ს თანამშრომლებმა აქციის მონაწილეების მისამართით გამოიყენეს წყლის ჭავლი.
დაკავებულია 2 პირი
პარლამენტთან „უცხოური გავლენის გამჭვირვალობის შესახებ“ კანონპროექტის წინააღმდეგ მიმდინარე აქციაზე 2 ადამიანი დააკავეს.
სამართალდამცველები აქტივისტებს მოუწოდებდნენ, რომ რუსთაველის გამზირის სავალი ნაწილი დაეტოვებინათ და პარლამენტის წინ ტერიტორიაზე გადასულიყვნენ. აქტივისტების ნაწილი ამ მოწოდებას დაემორჩილა, ხოლო ნაწილი - არა.
საპატრულო პოლიციის დეპარტამენტის უფროსმა ვაჟა სირაძემ სამართალდამცველებს მოუწოდა, მოქალაქეები ტერიტორიიდან უბრალოდ გაერიდებინათ, თუმცა საბოლოოდ, 2 პირი მაინც დააკავეს.
ვაჟა სირაძის გაცხადებით, დაკავებული ადამიანები ნასვამ მდგომარეობაში იმყოფებოდნენ და სამართალდამცველებს შეურაცხყოფა მიაყენეს.
„პიროვნება მოსული იყო პოლიციელებთან და არაერთხელ მოვუწოდეთ, რომ გასულიყო გვერდზე და გაეგრძელებინა პროტესტი. ძალიან ნასვამ მდგომარეობაშია და არაერთი შეურაცხყოფა მიაყენა თითოეულ პოლიციელს, რაც დაფიქსირებულია კამერების საშუალებით“, - განაცხადა ვაჟა სირაძემ.
წაიკითხეთ ასევე: