კაცს თავის ტვინში ჭია აღმოუჩინეს, რომელიც ორგანიზმში ნახევრად მოხარშული ბეკონის მირთმევის შედეგად მოხვდა - რა დაადგინეს ამერიკელმა ექიმებმა
ფლორიდის საავადმყოფოში მამაკაცი შაკიკის ჩივილებით მივიდა. შესაბამისი კვლევის შედეგად აღმოჩნდა, რომ მას თავის ტვინში პარაზიტული ლენტის ჭიის ლარვები ჰქონდა - ამის შესახებ Journal of Case Reports-ში გამოქვეყნებულ მოხსენებაშია აღნიშნული.
- პაციენტის თქმით, ოთხი თვის განმავლობაში იტანჯებოდა თავის ტკივილით, რომელიც ყოველკვირეულად უარესდებოდა, ტკივილგამაყუჩებელს არანაირი ეფექტი არ ჰქონდა
ექიმმა მას კომპიუტერული ტომოგრაფია ურჩია, შედეგად თავის ტვინში მრავლობითი კისტა აღმოჩნდა, თავდაპირველად ფიქრობდნენ, რომ ეს იშვიათი ნევროლოგიური მდგომარეობა უნდა ყოფილიყო, რომელსაც თანდაყოლილი ნეიროგლიური კისტა ეწოდება.
ლაბორატორიული კვლევის შედეგად დადგინდა, რომ თავის ტვინში არსებული კისტა, სინამდვილეში პარაზიტული ლენტის ჭიის ლარვები იყო. ამან ინფექცია გამოიწვია, რომელსაც ნეიროცისტიცერკოზი ეწოდება.
- ნეიროცისტიცერკოზი - ცისტიცერკით გამოწვეული დაავადებაა. ადამიანის ინფიცირება ხდება საკვებში ან წყალში არსებული პარაზიტის კვერცხების ჩაყლაპვით. ცისტიცერკების მოხვედრა თავის ტვინში იწვევს გონებრივ დეგრადაციას, დამბლას, ეპილეფსიურ შეტევებს და კრუნჩხვებს, რამაც საბოლოო ჯამში შეიძლება სიკვდილი გამოიწვიოს.
- თუ ადამიანის ორგანიზმში მოხვდა ლარვა მაშინ მიემაგრება ნაწლავს და ნაწლავში იზრდება, თუ მოხვდება კვერცხის სახით, მაშინ ვითარდება ნეიროცისტიცერკოზი თავის ტვინში.
ამ შემთხვევაში მამაკაცს არ გააჩნდა ტიპური რისკ-ფაქტორები: არ ჰქონია მჭიდრო კონტაქტი ღორებთან და არ ცხოვრობდა ცუდ სანიტარულ პირობებში, თუმცა აღიარა, რომ ხშირად მიირთმევდა მსუბუქად მოხარშულ ბეკონს. პაციენტს მკურნალობდნენ სტეროიდებით და ანტიპარაზიტული საშუალებებით. მოხსენების თანახმად, მისი მდგომარეობა გაუმჯობესდა.
ნეიროცისტიცერკოზი იშვიათია შეერთებულ შტატებში. ამ დაავადებისგან თავის არიდება შესაძლებელია ხორცის უსაფრთხო ტემპერატურაზე მომზადებით, ასევე ხელების ხშირი დაბანით.